बाइबल

हामी विश्वास गर्छौं कि पुरानो र नयाँ नियमहरू भएको पवित्रशास्त्र नै बाइबल हो, जो परमेश्वरको वचन हो। “…परमेश्वरकै वचनजस्तो गरी ग्रहण गर्यौ; अनि यो सत्य पनि हो…” (१ थेस्सलोनिकी २:१३)। हामी पहिलो लेखहरूका शाब्दिक र पूर्ण प्रेरणामा विश्वास गर्छौं। हामी विश्वास गर्छौं कि परमेश्वरले आफ्नो पवित्र वचनलाई हरेक पुस्तामा सुरक्षित राख्नुभएको छ, राख्नुहुन्छ (२ तिमोथी ३:१६; भजनसंग्रह १२:६-८)। हामी विश्वास गर्छौं कि बाइबल त्रुटिरहित र अकाट्य छ। यो परमेश्वरको स्वास प्रदित वचन हो।

हामी पुरानो नियमको लागि मेजोरेटिक टेक्सट् र नयाँ नियमको लागि टेक्सटस रिसेप्टस प्रयोग गर्छौं। हामी अंग्रेजी भाषामा आधिकारिक किंग जेम्स भर्जन प्रयोग गर्छौं। हामी किंग जेम्ससँग मिलान गर्दै अनुवाद गरिएको नेपाली बाइबल प्रयोग गर्छौं। बाइबल नै हाम्रो विश्वास र अभ्यासको एक मात्र र अन्तिम अधिकार हो।

परमेश्वरत्व

हामी त्रिएक परमेश्वरमा विश्वास गर्दछौं जो अनन्तताका लागि तीन व्यक्तिमा अस्तित्व राख्नुहुन्छ – पिता, पुत्र र पवित्र आत्मा। यी तीन व्यक्तिहरू अस्तित्वमा एक, प्रकृति र स्वभावमा एक, शक्ति र महिमामा एक तथा शिद्धता र चरित्रमा एक हुनुहुन्छ (व्यवस्था ६:४; २ कोरिन्थी १३:१४)। हामी विश्वास गर्छौं कि परमेश्वरले सारा सृष्टि ६ अक्षरस (२४ घण्टाका) दिनहरूमा सृष्टि गर्नुभयो (उत्पत्ति १:१-२७)।

ख्रीष्टको व्यक्तित्व र कार्य

हामी विश्वास गर्छौं कि प्रभु येशू ख्रीष्ट, जो परमेश्वरका पुत्र हुनुहुन्छ, परमेश्वर प्रकाश गर्न र पापी मानिसलाई मुक्ति दिन मानिस बन्नुभयो। पवित्र आत्माद्वारा उहाँ कन्या मरियमबाट जन्मनुभयो। मानिस हुँदा पनि उहाँ शतप्रतिशत परमेश्वर नै हुनुहुन्थ्यो (यूहन्ना १:१-२,१४; लूका १:३५; यशैया ९:६; ७:१४; फिलिप्पी २:५-८; गलाती ४:४-५)।

हामी विश्वास गर्छौं कि येशू ख्रीष्टले हाम्रो मुक्तिको कार्य क्रुसमा पूरा गर्नुभयो। उहाँले यो उद्धारको कार्य आफ्नो प्रायश्चित र सट्टा-भर्नाको बलिदानद्वारा गर्नुभयो। हाम्रो धार्मिकता उहाँको अक्षरस र शारिरीक मृत्युबाटको बौरीउठाइबाट सुनिश्चित गरिएको छ (रोमी ३:२५-२५; १ पत्रुस २:२४; एफेसी १:७; १ पत्रुस १:३-५)।

हामी विश्वास गर्छौं प्रभु येशू ख्रीष्ट शरीरमा बौरि उठाइनुभयो र स्वर्गमा उचालिनुभयो। उहाँ आज पिताको दाहिने हातमा महिमित अवस्थामा विराजमान हुनुहुन्छ। हाम्रो महापूजाहारिको रूपमा हाम्रो प्रतिनिधित्व गर्दै वकिल र अन्तर्विन्ती गर्ने व्यक्तिको रूपमा सेवारत हुनुहुन्छ (प्रेरित १:९-१०; हिब्रू ९:२४; ७:२५; रोमी ८:३४; १ यूहन्ना २:१-२)।

पवित्र आत्माको व्यक्तित्व र कार्य

हामी विश्वास गर्छौं कि पवित्र आत्मा एक व्यक्ति हुनुहुन्छ जसले संसारलाई पाप, धार्मिकता र न्यायको विषयमा कायल पार्नुहुन्छ। उहाँ नयाँ जन्मको माध्यम हुनुहुन्छ र हरेक विश्वासीमा वास गर्नुहुन्छ। हरेक विश्वासीलाई उहाँले मुक्तिको दिनसम्मको लागि छाप मार्नुहुन्छ (यूहन्ना १६:८-११; २ कोरिन्थी ३:६; रोमी ८:९; एफेसी १:१३-१४। हामी विश्वास गर्छौं कि पवित्र आत्माका चिन्हका दानहरू जस्तो अन्यभाषा बोल्ने, चंगाइको दान अस्थायी थिए। हामी विश्वास गर्छौं कि अन्यभाषामा बोल्ने दान कहिल्यै पनि सामान्य रूपमा बढि प्रयोग हुने या आवश्यक दान थिएन। परमेश्वरले आज पनि रोगबिमारबाट चंगाइका लागि प्रार्थनाको जवाफ दिन सक्नुहुन्छ तर आत्माका दानहरू कहिल्यै पनि मुक्तिको लागि आवश्यक चिन्हहरू थिएनन् (२ कोरिन्थी १२:१२; १ कोरिन्थी १३:८; हिब्रू २:३-४; मर्कूस १६:१७-२०; १ कोरिन्थी १:२२; १४:२१-२२)।

शैतान

हामी विश्वास गर्छौं कि शैतान वास्तविक व्यक्ति हो। शैतान र त्यसका दूतहरूले परमेश्वरको योजना र उद्देश्यका विरूद्ध आत्मिक लडाईं गर्छन् (यूहन्ना १३:२; प्रेरित ५:३; एफेसी ६:११-१२)। हामी विश्वास गर्छौं कि शैतान शूरूमा एक स्वर्गदूतको रूपमा सृष्टि गरिएको थियो जसले पछि विद्रोह गर्यो। शैतानले मानिसलाई परिक्षा गरी परमेश्वर विरूद्धको विद्रोहमा तान्यो (यशैया १४:१२-१७; इजकिएल २८:११-१९; उत्पत्ति ३:१-५)। हामी विश्वास गर्छौं कि शैतानको सामर्थ्य ठूलो छ तरै पनि ऊ सिमित छ। उसले परमेश्वरको अनुमतिबिना केहि गर्न सक्दैन (अय्यूब १:६-१२; १ यूहन्ना ४:४)। शैतानको अनन्त अन्त्य अनन्त पीडाले भरिएको आगोको झीलमा हुनेछ (प्रकाश २०:१०)।

मानिस

हामी विश्वास गर्छौं कि मानिस परमेश्वरको प्रतिरूपमा सृष्टि गरिएको थियो तर आदमको पापको कारणले सारा मानव जाति पतित भयो। हरेक मानिसमा यहि पाप स्वभाव सर्न पुग्यो जसले गर्दा हरेक मानिस परमेश्वरबाट बिरानो भयो। हरेक मानिस पूर्ण रूपमा पतित छन् र आफैले आफैलाई कुनै हालतले पनि यो हराएको अवस्थाबाट बचाउन सक्दैनन् (उत्पत्ति १:२६-२७; रोमी ३:२२-२३; एफेसी २:१-३,१२)।

मानव व्यक्तित्वको विशेषता र महत्व यसबाट पुष्टि भएको छ कि परमेश्वरले मानिसलाई आफ्नै प्रतिरूपमा सृष्टि गर्नुभयो र उहाँले मानिसको वास्ता गर्नुहुन्छ, अनि ख्रीष्ट मानिसको लागि मर्नुभयो। त्यसैले हरेक मानिसको मूल्य र सम्मान छ। हरेक मानिसलाई त्यसै अनुरूप आदार र ख्रीष्टिय प्रेम गरिनुपर्दछ (भजनसंग्रह ८:४-९; कलस्सी ३:९-११)।

हामी विश्वास गर्छौं कि बाइबलले सिकाउने विवाह एक पुरूष र एक महिलाबीचको विवाह मात्रै हो (उत्पत्ति २:२४; रोमी ७:२; १ कोरिन्थी ७:१०; एफेसी ५:२२-२३)। हामी विश्वास गर्छौं कि एक पुरूष र एक महिलाबीचको विवाह बाहेक कुनै पनि प्रकारको शारिरीक सम्बन्धलाई परमेश्वरले पूर्ण रूपमा प्रतिबन्ध गर्नुहुन्छ। हामी विश्वास गर्छौं कि कुनै पनि प्रकारको समलिंगि सम्बन्ध, पशु सम्बन्ध, व्यभिचार, पोर्नोग्राफिहरू परमेश्वरको उद्देश्यलाई बङ्याउने प्रयास हुन् र त्यसैले पाप हुन्। हामी विश्वास गर्छौं कि परमेश्वरले कुनै प्रकारको र कुनै तरिकाले लिंग परिवर्तन गर्ने प्रयासलाई प्रतिबन्ध गर्नुहुन्छ (उत्पत्ति २:२४; उत्पत्ति १९:५, १३; उत्पत्ति २६:८-९; लेवी १८:१-३०; रोमी १:२६-२९; १ कोरिन्थी ५:१; ६:९; १ थेस्सलोनिकी ४:१-८; हिब्रू १३:४)।

मुक्तिको बाटो

हामी विश्वास गर्छौं कि मुक्तिको प्रष्ट सन्देश यो हो – “परमेश्वरप्रतिको पश्चताप र प्रभु येशू ख्रीष्टमाथि विश्वास” (प्रेरित २०:२१)। हामी विश्वास गर्छौं कि मुक्ति अनुग्रहद्वारा मिल्दछ। हामी विश्वास गर्छौं कि येशू ख्रीष्ट हरेक मानिसको लागि मर्नुभयो र हरेक मानिसले परमेश्वरको अनुग्रहलाई यात ग्रहण गर्ने निर्णय गर्दछ या इन्कार गर्ने निर्णय गर्दछ (हिब्रू २:९; १ यूहन्ना २:२)। हामी विश्वास गर्छौं कि मानिसहरू विश्वासद्वारा मात्रै धर्मी ठहराईंदछन्। प्रभु र मुक्तिदाता येशू ख्रीष्टको कारणले परमेश्वर अघि धर्मी गनिन्छन् (एफेसी २:८-१०; यूहन्ना १:१२; १ पत्रुस १:१८-१९)।

हामी विश्वास गर्छौं कि सबै मुक्ति पाएकाहरू एक चोटि मुक्ति पाएपछि सदाका लागि परमेश्वरको सामर्थ्यद्वारा ख्रीष्टमा सुरक्षित राखिन्छन्। हामी विश्वास गर्छौं कि अनन्त जीवन हरेक विश्वासीको वर्तमान अधिकार र दान हो (यूहन्ना ६:३७-४०; १०:२७-३०; रोमी ८:१, ३८-३९; १ कोरिन्थी १:४-८; १ पत्रुस १:४-५; यहूदा १:१,२)।

मण्डली

हामी विश्वास गर्छौं की नयाँ नियम मण्डली बप्तिष्मा लिएका विश्वासीहरूका स्थानीय भेला हो जसले स्वइच्छाले सुसमचार प्रचार गर्ने महान आज्ञा पूरा गर्न आफैलाई मण्डलीमा आवद्धित गरेका छन्। प्रभुले आफ्नो कार्य यस संसारमा मण्डली मार्फत गर्दै हुनुहुन्छ। मण्डलीको शुरूवात र निरन्तरताको विषयमा नयाँ नियमका खण्डहरूमा प्रष्टसँग सिकाइएको छ (प्रेरित १४:२७; २०:१७, २८-३२; १ तिमोथी ३:१-१३; तीतस १:५-११)।

हामी विश्वास गर्छौं कि हरेक स्थानीय मण्डली स्वचालित हुँदछ र बाह्य अधिकार र नियन्त्रणबाट मुक्त हुँदछ। ख्रीष्ट नै एक मण्डलीको एक मात्र शिर हुनुहुन्छ। तथापि शिक्षा मिल्ने मण्डलीहरूबीच संगति र सहकार्य बाइबलले सिकाउँदछ (प्रेरित १३:१-४; १५:१९-३१, २०:२८; रोमी १६:१,४; १ कोरिन्थी ३:९,१६; ५:४-७,१३; १ पत्रुस ५:१-४)।

पानीमा डुबाई गरिने बप्तिष्मा र प्रभु भोजलाई हामी मण्डलीका बाइबलीय दुई रीतिहरूका रूपमा विश्वास गर्दछौं। यी कार्यहरूद्वारा स्थानीय मण्डलीहरूले यस युगमा ख्रीष्टको गवाहि दिने कार्य गर्दछन् (मत्ती २८:१९-२०; प्रेरित २:४१-४२; १८:१८; १ कोरिन्थी ११:२३-२६)।

बाइबलीय अलगपनता

हामी विश्वास गर्छौं कि हरेक मुक्ति पाएको व्यक्तिले यसरी जिउनु पर्दछ ताकि आफ्नो मुक्तिदाता र प्रभुको नामको निन्दा नहोस्। धार्मिक भ्रमहरू, सांसारिकता, पापमय आनन्दहरू, अभ्यासहरू र संगतहरूबाट अलत हुनुपर्दछ भनी परमेश्वरले आज्ञा दिनुहुन्छ (२ तिमोथी ३:१-५; रोमी १२:१,२;१४:१३; १ यूहन्ना २:१५-१७; २ यूहन्ना १:९-११; २ कोरिन्थी ६:१४-७:१)।

येशू ख्रीष्टको दोस्रो आगमन

हामी विश्वास गर्छौं कि येशू ख्रीष्टको दोस्रो आगमन, जो हरेक विश्वासीको आशिषत आशा हो, अक्षरश, व्यक्तिगत, देखिने, छिट्टै, हजार वर्षे राज्य अघि र महासंकट काल अघि हुने कार्य हो। विश्वासीहरू सात वर्षको महासंकट काल अघि येशूसंग उठाईलगिने छन् र महासंकट काल पछि ख्रीष्ट आफ्ना जनहरूसँग हजार वर्षको राज्य स्थापना गर्न फर्कनुहुनेछ (१ थेस्सलोनिकी ४:१३-१८; तीतस २:१३; १ थेस्सलोनिकी १:१०; प्रकाश ३:१०; जकरिया १४:४-११; प्रकाश १९:११-१६, २०:१-६; भजनसंग्रह ८९:३-४)।

हाम्रो अनन्त अवस्था

हामी विश्वास गर्छौं कि हरेक मानिस मृत्युपछि शरीरमा बौरिउठ्ने छन्। मुक्ति पाएकाहरू अनन्त जीवनका लागि र मुक्ति नपाएकाहरू चाहिँ न्याय र अनन्त दण्डका लागि (मत्ती २५:४६; यूहन्ना ५:२८,२९, ११:२५-२६; प्रकाश २०;५-६, १२-१३)।

हामी विश्वास गर्छौं कि मुक्ति पाएकाहरूका प्राण मृत्यु पछि शरीरबाट अलग हुन्छ तर परमेश्वर सामु उपस्थित हुँदछ, जहाँ उनीहरू आनन्दमा पहिलो बौरिउठाइको प्रतिक्षामा रहन्छन् जति बेला आत्मा, प्राण र शरीर पुन एक बनाइन्छ र सदाका लागि प्रभुसँगै महिमित बनाइन्छ (लूका २३:४३; प्रकाश २०:४-६; २ कोरिन्थी ५:८; फिलिप्पी १:२३; ३:२१; १ थेस्सलोनिकी ४:१६-१७)।

हामी विश्वास गर्छौं कि मुक्ति नपाएकाहरूका प्राण मृत्यु पछि दोस्रो बौरिउठाइ नभएसम्म पीडित अवस्थामा रहन्छन्। दोस्रो बौरिउठाइमा प्राण र शरीर एक भई न्यायको महान् सेतो सिंहासन अघि उभिनेछन् र सदाका लागि आगोको झिलमा फ्याकिनेछन् जहाँ उनीहरूको विनाश हुनेछैन तर अनन्तको पीडा र दण्ड हुनेछ (लूका १६:१९-२६; मत्ती २५:४१-४६; २ थेस्सलोनिकी १:७-९; यहूदा १:६-७; मर्कूस ९:४३-४८; प्रकाश २०:११-१५)।

*हाम्रो सम्पूर्ण विश्वासको सार माथि उल्लेखित सारमा मात्रै सिमित छैन। बाइबल नै हाम्रो विश्वासको एक मात्र र अन्तिम श्रोत हो। हामी यो विश्वास गर्छौं कि माथि उल्लेखित सारले बाइबलका शिक्षाहरूलाई सहि तरिकाले संक्षिप्तमा प्रतिनिधित्व गर्दछ।

1st Ebenezer Bible School Bible Quiz